Galicia futura

A EXPOSICIÓN ‘GALICIA FUTURA’ ENCARA A SÚA DERRADEIRA SEMANA POR RIBA DAS 35.000 VISITAS
 
—   A mostra, que pechará o vindeiro domingo no Museo Gaiás acada unha media diaria de arredor de 250  persoas.
—   A exposición poderá verse ao longo de 2022 noutras cidades de Galicia no marco dun programa de itinerancias que se dará a coñecer proximamente.
—   Comisariada por Miguel Ángel Cajigal e Deborah García Bello, inclúe preto de 20 pezas inéditas creadas por artistas como Marta Pazos, Oliver Laxe, Rubén Ramos Balsa, Estíbaliz Espinosa ou Vítor Mejuto

Santiago de Compostela, 4 de xaneiro de 2022.
​A Cidade da Cultura de Galicia despide o vindeiro domingo 9 de xaneiro a exposición Galicia futura. Todo o que imos ser, que chega á súa derradeira semana no Museo Centro Gaiás superando as 35.000 visitas e cunha media diaria de arredor de 250. Ademais, un milleiro de escolares de Primaria, Secundaria, Bacharelato e FP participaron no programa didáctico dunha mostra que supuxo a volta presencial das visitas educativas presenciais tras a pandemia, pese a que tamén se contou con oferta de visitas a través de videoconferencia para os centros que o solicitasen.
A mostra impulsada pola Xunta de Galicia, que aínda pode visitarse de balde todos os días desta semana con horario de 10,00 a 20,00 horas no primeiro andar do Museo, convida a un suxestivo percorrido que dialoga entre arte, ciencia, tecnoloxía e creatividade. A mostra tamén se achegará a outras cidades galegas ao longo de 2022, grazas a un programa de itinerancias (que se dará a coñecer proximamente) e que se enmarca no obxectivo estratéxico do Gaiás de converterse nunha factoría de contidos para outros centros culturais de Galicia, descentralizando a súa actividade.
Con Galicia futura a Consellería de Cultura, Educación e Universidade pecha a triloxía de grandes exposicións organizadas con motivo do Xacobeo, que comezou con Galicia, un relato no mundo e continuou con Galicia, de Nós a nós.

Un espazo de creación
A mostra quere transcender os límites físicos do propio museo e impulsar procesos artísticos propios. Así, exhibe unha vintena de pezas creadas especificamente para este proxecto por destacados nomes da plástica, as letras, o audiovisual, a ciencia, a escena, o deseño ou a música galega. Obras da dramaturga Marta Pazos, o cineasta Oliver Laxe, os artistas Rubén Ramos Balsa e Vítor Mejuto, o fotógrafo Damián Ucieda ou a poeta Estíbaliz Espinosa, entre outros moitos, contribúen á visión diversa e coral que tenta ofrecer a exposición.
A mostra está comisariada por Miguel Ángel Cajigal e Deborah García Bello, coñecidos nas plataformas dixitais como @elbarroquista e @deborahciencia, dous galegos que nos últimos anos se situaron entre os divulgadores máis dinámicos e recoñecibles no eido artístico e científico. Ademais, coa exposición como pano de fondo e conducido por Deborah García Bello, o encontro #Culturalike3 congregou tamén no Gaiás a seis recoñecidos divulgadores para falar de novos modelos de comunicación da cultura e a ciencia con nomes como a escritora Espido Freire, a historiadora Sara Rubayo, a bióloga e neurocientífica Tamara Pazos ou o químico e investigador Juan Manuel Bermúdez.
​
Imaxinando o porvir
Partindo da pregunta Como imaxinas ti a Galicia futura?, a exposición toma o pulso do presente para propoñer un percorrido por fitos e ideas innovadoras que están a marcar os vieiros do porvir da nosa comunidade en diferentes campos. Explora así un futuro desexado e posible, en base ao traballo que están a desenvolver a día de hoxe diferentes profesionais e grupos de vangarda e propóndose amosar o que se está a facer desde distintas áreas do coñecemento, facer visible como as conexións entre os diferentes campos do saber nos permiten comprender a súa progresión, e procurar as claves e estratexias que están a configurar o porvir de Galicia.Haz clic aquí para editar.